Agim Ademi është rizgjedhur kryetar i Federatës së Futbollit të Kosovës edhe për katër vite të tjera.
Pas votimit në Kuvendin Zgjedhor të FFK-së, u konfirmuar se Ademi do të jetë në krye të futbollit kosovar edhe për katër vite të tjera, shkruan Gazeta Olle.
Me 42 vota pro, një abstenim dhe asnjë kundër, Agim Ademi u zgjodh President i shtëpisë së futbollit vendor, duke vazhduar kështu mandatin e tij.
Pasi morin besimi përsëri për të drejtuar FFK-në, Ademi ka reaguar edhe në profilin e tij zyrtar në rrjete sociale.
I pari i FFK-së shprehet i nderuar dhe i lumtur që iu dha besimi për të drejtuar FFK-në, duke premtuar se me përkushtimin më të madh do të vazhdojë të punojë vetëm për të mirën e futbollit.
Postimi i plotë i Agim Ademit.
Të nderuar miq,
Jam jashtëzakonisht i nderuar dhe i lumtur që sot më është besuar drejtimi i Federatës së Futbollit të Kosovës edhe për një mandat të ri katërvjeçar nga shumica absolute e delegatëve të Kuvendit të FFK-së.
Jam pafundësisht falënderues ndaj komunitetit të futbollit, delegatëve, Komitetit Ekzekutiv të gjithë akterëve tjerë të futbollit të cilët më kanë përkrahur dhe kanë besuar në punën time.
Një falënderim i veçantë për presidentin e FIFA-s, Gianni Infantino dhe atë të UEFA-s, Aleksandër Çeferin, për mbështetjen e tyre të parezervë ndaj projekteve të FFK-së.
Mirënjohje e respekt për presidentin Armand Duka e presidentin Muhamed Sejdini, si dhe presidentin e KOK-ut, Ismet Krasniqi, por edhe të gjithë drejtuesit e institucioneve tona.
Ju premtoj se me përgjegjësinë dhe përkushtimin më të madh do të vazhdoj të punoj vetëm për të mirën e futbollit.
Do të jem i hapur për çdo bashkëpunim që është në dobi të futbollit dhe me shumë kujdes do të veprojmë bashkë për futbollin.
Futbolli i Kosovës është në rrugën e duhur, prandaj ne do ta shtyjmë atë përpara duke i ndihmuar klubet, futbollistët e futbollistet tona, duke u krijuar kushte dhe duke i motivuar të rinjtë që t’i bashkohen futbollit dhe të punojnë për imazhin e tyre dhe të vendit.
Ju falënderoj shumë të gjithëve dhe na priftë e mbara së bashku në rrugëtimin e ri katërvjeçar.
A.A.
#BASHKËPËRFUTBOLLIN
/Gazeta Olle/
