Dibër, 11 janar – Organizata komunale e Kryqit të Kuq në Dibër, sot e kreu aksionin e parë të dhurimit të gjakut për këtë vit.
I njejti u realizua në bashkëpunim me Institutin për mjekësi transfuzioni, ekipi i të cilit ishte vendosur në hapësirat e organizatës, me ç’rast për disa orë u grumbulluan 26 njësi gjaku.
“Ky është aksioni i parë nga shtatë aksionet e rregullta të planifikuara të dhurimit të gjakut për këtë vit. Për dhurim të gjakut u paraqitën rreth 40 qytetarë, por për shkaqe të ndryshme, gjak dhuruan vetëm 26. Duke e pasur parasysh gjendjen me pandeminë me Kovid-19, aksionin e vlerësojmë si të suksesshëm”, deklaroi për MIA-n Isni Telqiu, sekretar i organizatës komunale të Kryqit të Kuq.
Shtoi se plani vjetor është projektuar në 744 njësi gjaku, sa ishte edhe vitin e kaluar.
“Për shkak të gjendjes së njohur me pandeminë, plani nuk u përmbush, u grumbulluan 386 njësi gjaku, por megjithatë mund të vlerësohet si i suksesshëm në planin e dhurimit të gjakut”, theksoi Telqiu.
Në vitet paraprake plani në nivel vjetor rregullisht jo vetëm që përmbushej, por tejkalonte mesatarisht për 20 për qind, me çka Dibra bën pjesë në komunat më humane në vend.
