Shkup, 15 gusht – Informacioni se kryetari i Komunës së Çairit, Visar Ganiu, dhe ai i Tetovës, Bilall Kasami, janë ftuar në polici për shkak të ikonografisë gjatë vizitës së kryeministrit të Kosovës, Albin Kurti, në vendin tonë, është dëshmi se ky pushtet e ka marrë teposhtën, thuhet në reagimin e partisë Alternativa.
“Duke e dënuar këtë akt si të turpshëm dhe tendencioz, na duhet të themi se nëse kjo nuk ka ndodhur me porosi të Vuçiqit, për çka dyshojmë seriozisht, atëherë është një sjellje me panik e pushtetit për shkak të humbjes së pritshme në zgjedhjet e ardhshme që e pret koalicionin “SORAVIA-BRAKO”.
Sidoqoftë, nëse kjo qeveri mendon se policia, forca, kërcënimi dhe dhuna është mënyrë për ta luftuar këtë koalicion dhe për ta fikur entuziazmin opozitar, na duhet t’ia rikujtojmë se kjo është mënyra më e mirë vetëm për ta përshpejtuar humbjen e tyre”, thuhet në reagimin e Alternativës.
