Llapi shënoi fitore 3-2 ndaj Drenicës, në ndeshjen e vlefshme për xhiron e dhjetë në Albi Mall Superligën e Kosovës.
Trajneri i Llapit, Tahir Batatina ka thënë pas ndeshjes se ndryshimet në skuadër e duan kohën e vet, shkruan Gazeta Olle.
Batatinën e gëzon edhe fakti që Festim Alidema është kthyer në formë.
“Ndryshimet në skuadër e duan kohën e vet. Kemi punuar që të kthehemi, të komponohemi. Kemi zhvilluar ndeshje të mirë, ndonëse kemi pasur disa gabime, sidomos në defanzivë. Më gëzon fakti që Festim Alidema shkëlqeu. Atij i është dashur kohë që të kthehet”, ka theksuar Batatina.
Sipas tij Llapi nuk është dorëzuar në garën për titull të kampionit. Ai thotë se Llapi po kthehet në formën më të mirë.
“Gradualisht skuadra po e merr formën e vet. Jemi afër katërshes së parë. Do të bëjmë maksimumin. Drenica luan futboll mirë jashtë, luan me pasime të shkurtra. Pasuam dy gola edhe për shkak të pakujdesisë. Llapi ka potencial. Në janar do të reagojmë në disa pozita dhe prapë do të jemi në katërshen e parë”, ka thënë Batatina.
/Gazeta Olle/
