Të gjithë i mbajnë mend emocionet dhe stresin para provimit teorik ose praktik për të marrë lejen e drejtimit.
Për disa, është një test i lehtë për t’u kaluar, ndërsa për disa të tjera, të menaxhosh të gjitha lëvizjet dhe të mos gabosh në drejtimin e mjetit është një sfidë e vështirë.
Për një shofere të re në Argjentinë, prova shkoi më keq se kaq. Kamerat e sigurisë kanë kapur momentin kur ajo drejton mjetin tip “Volswagen”. Në fillim, duket se zbaton rregullat e instruktorit, merr rrethrrotullim me shpejtësi të ulët dhe më pas drejtohet në një rrugë të shkurtër.
Situata më pas del jashtë kontrollit. Makina rrit shpejtësinë në kthesë dhe përfundon me gomën mbi trotuar, shkel barin. Shoferja nuk shtyp frenat dhe vazhdon të ecë mbi bar deri sa përplaset me një shtyllë dhe mjeti kthehet përmbys.
Fatmirësisht, gruaja pësoi lëndime të lehta, ndërsa instruktori nuk u dëmtua. Sa i përket provimit, është e qartë se shoferja dështoi ta kalonte.
