Shkup, 12 korrik – Situata epidemiologjike është e qetë dhe nuk mendohet të kërkohet konfirmim për vaksinimin ose test negativ të koronavirusit për të hyrë në vend, as për ne dhe as për shtetas të huaj, por theksi duhet të vendoset mbi vaksinimin si mekanizëm mbrojtës, tha sot ministri i Shëndetësisë, Venko Filipçe.
Sipas tij, nuk ka logjikë që për disa qytetarë të kërkohet, ndërsa për të tjerë të mos kërkohe vërtetim për vaksinim ose test negativ nëse kanë qëndruar jashtë vendit.
“Në atë kuptim, tani situata është vërtet e qetë. Kemi skenarë të ndryshëm në vende të ndryshme në të cilat edhe pse ka masa kufizuese në drejtim të kërkimit të dokumenteve, ka një rritje të madhe të rasteve. Kjo është arsyeja pse e vendosim theksin në vaksinimin si mekanizmi i vetëm për të rritur imunitetin kolektiv dhe për të parandaluar një valë të re”, tha Filipçe duke iu përgjigjur pyetjes së gazetarëve nëse planifikohet të kërkohen vërtetime vaksinimi ose test negativ të paktën për shtetasit e huaj.
Ai theksoi se ka një numër të madh të rasteve të reja në Mbretërinë e Bashkuar, por është e rëndësishme që të mos ketë vdekje dhe ky është thelbi i asaj që arrihet me vaksinimin.
“Kështu janë ndërtuar edhe politikat tona. Me të gjithë këto mekanizma që kemi – fushata, vaksinim në terren …, për t’u vaksinuar sa më shumë qytetarë. Me siguri do të ketë edhe lloje të reja të virusit, ndoshta do të ketë mutacione të reja. Megjithatë, ne nuk mund të jetojmë me kufizime. Kështu do të rikthejmë mënyrën normale të jetës”, tha ministri i Shëndetësisë në një deklaratë pas vizitës në Poliklinikën në Shuto Orizare me rastin e hapjes së një pike të re vaksinimi.
