Shkup, 8 shkurt – Qeveria sot solli vendim që ta tërheqë Propozim-ligjin për ndryshim dhe plotësim të Ligjit për përgjegjësi qytetare për ofendim dhe shpifje nga procedura kuvendore dhe në miratim para deputetëve ta parashtrojë tekstin e ri të propozim-ligjit në të cilin në nenin 6 është fshirë formulimi “mendim negativ”.
Me atë ndryshim neni 6 nga ligji i propozuar thotë: “Për ofendim përgjigjet ai që me qëllimin të përçmojë, me deklaratë, sjellje, publikim apo në ndonjë mënyrë tjetër do të shprehë për dikë tjetër me identitet të konfirmuar apo të dukshëm mendim përçmues apo ofendues, me të cilin shkelet nderi dhe imazhi i tij”, kumtoi shërbimi i Kuvendit për shtyp.
