Shkup, 17 qershor – Popullata e Maqedonisë së Veriut e rrezikuar nga përgjimet masive të jashtligjshme, alarmon VMRO – DPMNE.
Sipas partisë së Mickoskit, Agjencia Tekniko Operative, kompetente për ndjekjen e komunikimeve, në kundërshtim me ligjin është furnizuar me pajisje për të kryer përgjimet. Nga VMRO kërkojnë reagimin e prokurorisë publike.
“Duke pasur parasysh rastin dhe dëmin që mund të shkaktohet nëse nuk veprohet, apelojmë që sa më shpejtë të hapet hetim. Intervenimi duhet të jetë i menjëhershëm duke pasur parasysh momentin në të cilin ndodhet shteti përderisa qeveria po mundohet që të jetësojë ndryshimet kushtetuese, për të cilat nuk mbështetje. Institucionet nuk duhet të keqpërdoren. Ftojmë MPB-në dhe Spasovskin të thonë sa është e vërtetë që ATO ka marrë pëlqimin për këtë furnizim?”, u theksoi Brane Petrushevski nga VMRO – DPMNE.
Nuk ka reagim nga institucionet. Ndërkohë ditë më parë kanë reaguar nga ATO Agjencia Teknike Operative duke përgënjeshtruar deklarimet e deputetit Petrushevski.
Agjencia sipas tyre në asnjë moment nuk ka shkelur ligjin për ndjekjen e komunikimeve dhe nuk rrezikohet siguria kombëtare.
Sipas ATO-s ata në përputhje me ligjin kanë kërkuar financa për pajisje teknike, gjë për të cilën kanë marrë pëlqimin nga ministria e brendshme.
