Shkup, 8 prill – Zëvendëskryeministrja përgjegjëse për Politika të Qeverisjes së Mirë, Sllavica Gërkovska, ka takuar sot kryetarin e Këshillit Shtetëror të Italisë dhe ish-komisarin e BE-së për Drejtësi dhe Siguri, Franko Fratini, për të diskutuar mundësitë për bashkëpunim të ndërsjellë, veçanërisht në aspektin e praktikave të mira të cilat Italia i ka në krijimin e politikave antikorruptuese, në përmirësimin e rregulloreve të furnizimeve publike, si dhe në politikat për mirëqeverisjen në përgjithësi.
Sipas Qeverisë, Gërkovska falënderoi për mbështetjen që Italia i jep Maqedonisë së Veriut, si në procesin e integrimit evropian, ashtu edhe në nivel ekspert dhe teknik, si dhe prezantoi shtyllat më të rëndësishme të punës së saj, që janë politikat për efikasitet dhe transparencë më të madhe të institucioneve shtetërore, transformimi dixhital i shoqërisë, si dhe krijimi i politikave kundër korrupsionit.
Kryetari Fratini përshëndeti rezultatet e arritura nga Qeveria e Maqedonisë së Veriut në fushën e transparencës, por edhe zbatimin e të gjitha reformave që i kanë mundësuar vendit tonë të jetë një hap më afër marrjes së datës për negociata për anëtarësim në Bashkimin Evropian. Kryetari Fratini theksoi se Italia aktualisht po punon për një zgjidhje të re ligjore për furnizime publike, e cila do të përfshijë modelin ekzistues – një algoritëm efikas që vlerëson standardet në të gjitha furnizimet publike dhe alarmon nëse konstaton disa palogjikshmëri.
Ai shtoi se Italia, si kryetare e Rrjetit Evropian të Anëtarëve të Kryetarëve nga Gjykatat e Larta dhe Administrative të Shteteve Anëtare të BE-së, hap mundësinë që në këto takime të marrin pjesë, si vëzhgues, kryetarët e Gjykatave të Lartë dhe Administrative nga vendet kandidate për në BE.
Të dy bashkëbiseduesit vlerësuan se hapat për realizimin e këtyre dy çështjeve mund të nisin menjëherë dhe shprehën gatishmërinë për thellimin e bashkëpunimit edhe në sferat tjera sociale, të cilat janë të rëndësishme për qeverisje transparente, profesionale dhe të përgjegjshme, thuhet në deklaratën e shërbimit për shtyp të qeverisë.
