Gjykata Speciale ka bastisur sot banesën e Adil Behramaj, ish këshilltar i ish-presidentit Hashim Thaçi.
Lajmin për bastisjen e banesës së Behramajt e ka konfirmuar në një postim në Facebooj, Artan Behrami, po ashtu ish-këshilltar i Hashim Thaçit.
“Bastisja e banesës së mikut tonë dhe udhëheqësit të mediumit ‘Demokracia’, Adil Behramajt, nga Prokuroria e Gjykatës Speciale është një skandal i paprecedent. Ky është një kërcënim i hapur ndaj gazetarëve dhe lirisë së mediave në Kosovë. Pa paragjykuar motivet, frikësimi i gazetarëve nuk i bën nder Prokurorisë Speciale të Dhomave të Specializuara”, ka shkruar ish këshilltari tjetër i Thaçit.
Ndërkaq, lidhur me bastisjen e banesës së Adil Behramajt, Telegrafi i ka dërguar pyetje Gjykatës Speciale.
Nga Gjykata Speciale në një deklaratë me shkrim për shkrim për Telegrafin kanë thënë se nuk duan të komentojnë lidhur me hetimet.
“Zyra e Prokurorit Special nuk komenton hetimet e saj”, thuhet në deklaratë.
