Shkup, 5 tetor – Zëvendëskryeministri i parë dhe Ministri për Sistem Politik dhe Marrëdhënie ndërmjet Bashkësive Artan Grubi sonte i ftuar në Emisionin “Vetëm intervistë” në televizionin Kanal 5, në lidhje me bashkëpunimin me VMRO-DPMNE-në tha se nuk mund të bashkëpunojmë me parti të cilat janë kundër integrimit europian.
“Nuk do të mund të bëjmë bashkëpunim me parti të cilat nuk e njohin Marrëveshjen e Ohrit, Marrëveshjen e Prespës dhe Marrëveshjen e fqinjësisë së mirë me Bullgarinë, dhe të cilat i mbajnë peng qytetarët me një patriotizëm të rremë. Të rinjtë nuk kanë nevojë për këtë lloj patriotizmi ato kanë nevojë për realizimin e amendamenteve kushtetuese, që do të ju mundësojë qytetarëve që të mos ikin nga vendi jonë, dhe të kuptojnë se gjuha maqedonase dhe identiteti me ndryshimin kushtetues nuk preket fare, përkundrazi do të jetë gjuhë që do të njihet edhe nga Bashkimi Europian”, tha Grubi.
