Kasami: Objekti i ish Radio Tetovës duhet të jetë i disponueshëm për të gjithë, jo vetëm për qendrën sociale-kulturore

Tetovë, 27 tetor – Kryetari i Komunës së Tetovës, Bilall Kasami, njoftoi se do të bisedojë me përfaqësuesit e Qendrës Sociale-Kulturore që gjendet në objektin e ish Radio Tetovës, pas kërkesës së tyre të djeshme, por në të njëjtën kohë në një konferencë për media ai sqaroi se shoqata duhet ta lirojë hapësirën në mënyrë që objekti të jetë në dispozicion për të gjitha organizatat e shoqërisë civile.

Ai shpjegoi se shumë shoqata kanë kërkuar mbështetje dhe hapësirë për aktivitetet e tyre dhe prandaj kërkon që Qendra Sociale-Kulturore të koordinojë aktivitetet atje me Departamentin Komunal për Kulturë dhe Sport.

“Komuna e Tetovës asnjëherë nuk i ka penguar dhe nuk do t’i pengojë aktivitetet kulturore, përkundrazi ne si komunë gjithmonë i kemi mbështetur dhe do t’i mbështesim të gjitha aktivitetet që kanë për qëllim aktivizimin e të rinjve në jetën publike. Që kur morëm pushtetin lokal, shumë shoqata erdhën dhe kërkuan një hapësirë publike për realizimin e aktiviteteve të tyre, por ne nuk mundëm t’ua siguronim. Komuna vendosi të riorganizojë shfrytëzimin e objektit të Radio Tetovës, në mënyrë që të gjitha shoqatat që janë aktive në komunën tonë, përfshirë edhe atë të përmendurën, të mund të aplikojnë në mënyrë të drejtë dhe të barabartë me projektet që do t’i realizonin në këtë objekt, dhe kjo do të bëhet përmes Departamentit të Kulturës dhe Sportit pranë Sektorit për Veprimtari Publike”, tha Bilall Kasami.

Kryetari tha se në Memorandumin e Bashkëpunimit të nënshkruar nga komuna dhe shoqata e lartpërmendur, askund nuk theksohet se shfrytëzimi i hapësirave të ish-ndërtesës së Radio Tetovës është i përhershëm dhe vetëm për këtë shoqatë.

“Në memorandum nuk ka kushte dhe detyrime që duhet të zbatojnë palët nënshkruese dhe nuk ka ndonjë dokument tjetër me të cilin u është lejuar shfrytëzimi i hapësirës. Duke marrë parasysh ankesat e dërguara në komunën e Tetovës nga prindër të cilët janë ankuar se kjo shoqatë ka aktivitete të natyrës tjetër, të cilat nuk kanë të bëjnë me vlerat kulturore, por shfrytëzohen nga nxënës të shkollave të mesme dhe madje edhe nga nxënësit e shkollave fillore të cilët në fakt janë të mitur. Ne si komunë jemi të obliguar të mbrojmë pronën dhe interesin publik, duke mbajtur përgjegjësi për çdo lloj aksidenti që mund të ndodhë”, theksoi Bilall Kasami.

Kasami shtoi se shoqata duhet të lirojë hapësirën dhe të aplikojë si të gjitha organizatat e tjera për shfrytëzimin e objektit në aktivitete të caktuara.

Të nderuara media,Тë nderuar qytetarë,Qëllimi i kësaj konference për shtyp, siç edhe kisha paralajmëruar paraprakisht, është njoftimi i opinionit lidhur me situatën e krijuar të shfrytëzimit të hapësirave nga ana e Social Cultural Space Tetova, e cila ditëve të fundit në formë të organizuar, duke i manipuluar edhe shoqatat tjera simotra të cilat nuk e njohin problematikën, po tenton në mënyrë të padrejtë që të përvetësojë këto hapësira me tendencën e krijimit të monopolit kundrejt shoqatave tjera.Komuna e Tetovës asnjëherë nuk ka penguar dhe nuk do të pengojë aktivitete kulturore, përkundrazi, ne si komunë gjithmonë kemi mbështetur dhe do të mbështesim aktivitete kulturore e veçanërisht aktivitetet rinore të cilat kanë për synim aktivizimin e rinisë në jetën publike. Që nga marrja e mandatit në komunë kanë ardhur shumë shoqata të cilët kanë kërkuar hapësira publike për realizimin e aktiviteteve të tyre, por ne në mungesë të hapësirave adekuate nuk kemi mundur tu sigurojmë hapësirat e nevojshme, kështu Komuna ka zgjedhë që objekti në fjalë të shfrytëzohet nga të gjithë organizatat që veprojnë në komunën tonë, përfshirë edhe shoqatën në fjalë, të cilët do të aplikojnë në mënyrë të drejtë dhe të barabartë, dhe kjo do të bëhet përmes Njësisë për kulturë dhe sport të Sektorit për veprimtari publike.Njëherit theksojmë që në Memorandumin e bashkëpunimit që është nënshkruar nga ana e komunës dhe shoqatës në fjalë nuk potencohet askund shfrytëzimi i hapësirave të objektit të ish Radio Tetovës, dhe leje për shfrytëzim nuk mund të jepë kryetari i komunës duke nënshkruar memorandume, por për dhënien në shfytëzim të hapsirave publike kompetente është këshilli i komunës duke përfshirë edhe procedurat tjera ligjore.Duke llogaritur në ankesat e drejtuara deri në komunën e Tetovës nga prindër të cilët janë ankuar se aty për aktivitete të natyrës së ndryshme që nuk kanë të bëjnë aspak me vlera kulturore por përdoren nxënës të shkollave të mesme që faktikisht janë nën moshën 18 vjeçare, ne si komunë obligohemi për mbrojtjen e pronës dhe interesit publik, duke mbajtur përgjegjësi në çdo lloj fatëkeqësie që mund të ndodhë dhe të njëjtën përgjegjësi nuk e kemi kaluar me asnjë dokument tek ndonjë autoritet tjetër.Ndaj mbetemi në qëndrimin e parë që shoqata e lartëpërmendur duhet ta lirojë hapësirën dhe të aplikojë si gjithë të tjerët për shfytëzimin e objektit në aktivitete të caktuara dhe këtë të drejtë nuk do ta kenë ekskluzivisht vetëm ata, por të njëjtën do ta ndajnë edhe me organizatat dhe shoqatat tjera që do të shprehin interes dhe nevojë për hapësirë e që komuna gjithsesi se do të jetë gjithnjë në shërbim të tyre.
Posted by Bilall Kasami on Thursday, October 27, 2022