Shkup, 14 korrik – Javën e ardhshme është paralajmëruar se do të vijnë tre ministra të Evropës, i Gjermanisë, Francës dhe Polonisë. Po e them prapë, nëse vijnë për ndryshimet kushtetuese, mesazhi ynë është i njëjti, argumentet tona janë të njëjta, nga ajo anë nuk dëgjoj një pikë të re dhe nëse vijnë për këtë, do të shqetësohem shumë sepse këta njerëz këtu, gjëja e fundit që u shkon në mendje janë ndryshimet kushtetuese, tha sot lideri i VMRO-DPMNE-së gjatë vizitës së tij në Prilep, duke iu përgjigjur pyetjeve të gazetarëve.
“Dje bisedova me tre ministrat e punëve të jashtme nga Austria, Çekia dhe Sllovakia, patëm një debat të arsyetuar në Kuvend, i shprehëm qëndrimet tona, ato qëndrime janë të njëjta, të pandryshuara, dhe nëse dikush e izolon Maqedoninë, janë kriminelët nga pushteti për shkak të nivelit të krimit dhe pamundësisë për të zbatuar reformat. Ndryshimi i Kushtetutës nuk është kriter për izolimin e Maqedonisë, dhe nga ana tjetër, nga të njëjtët tre kam marrë siguri se në asnjë moment nuk e kanë thënë fjalën izolim, por kanë thënë se do të ketë vonesa në proces”, tha Mickoski.
Do të ketë një vonesë të procesit, sipas tij, “për faktin se qeveria Kovaçevski nënshkroi një marrëveshje nën diktatin bullgar të cilën populli nuk e pranon edhe jashtë konsensusit politik”.
“Fajtori kryesor nëse Maqedonia vonohet në proces është kjo Qeveri kriminale, sepse përpos që i nënshkruan kontrata verbërisht, ajo vjedh shumë dhe është e paaftë. Nëse e gjithë kjo do të ishte në kundërshtim me atë që po them, sot do të flisnim tashmë për hapje të klasterëve, hapje kapitujsh etj. Por edhe kjo do të ndodhë. Me ndryshimin e kësaj qeverie do të vijnë njerëz që dinë ta nxjerrin Maqedoninë nga kjo gjendje në të cilën ndodhet. Njerëzit kanë probleme reale, thelbësore se si ta kalojnë muajin, si të përgatiten për sezonin e ardhshëm të ngrohjes, a ka rëndësi për fermerët nëse do të ketë ndryshime kushtetuese apo nëse do ta shesin produktin, ky është thelbi”, vlerësoi Mickoski gjatë vizitës në Prilep.
