Shkup, 15 gusht – Nesër (e mërkurë) në Tetovë do të ketë protesta për zjarrin tragjik në Spitalin Modular.
Protesta e cila do të fillojë në ora 12:00, do të mbahet para Gjykatës Themelore, ndërsa organizohet nga iniciatiava “Më mirë për Tetovën”.
Protesta vjen pas publikimit të dokumentarit nga IRL, i cili zbuloi mjaft lëshime në procedurat e ndërtimit të Spitalit Modular.
Sipas dokumentarit të publikuar nga IRL u pa se hetimet për shkaqet e zjarrit në Spitalin Modular nuk kanë qenë të plota, si dhe anashkaluese për zyrtarë të lartë dhe kompaninë që ishte përgjegjëse për ndërtimin e spitaleve modulare.
I vetmi proces gjyqësor në lidhje me ngjarjen ku jetën e humbën 14 persona është ai ku u shpallën fajtor ish-drejtori i spitalit të Tetovës, Florin Besimi që u dënua me 1 vit e 6 muaj burg me kusht, po ashtu 1 vit e 6 muaj me kusht edhe ish drejtori ekonomik – Artan Etemi, që do të thotë se ata nuk do të vuajnë dënim me burg nëse për 3 vjet nuk kryejnë vepër të re penale. Mjeku përgjegjës për qendrën e Kovidit – Boban Vuçevski u lirua nga akuza. Ndërkaq, Spitali i Tetovës mori dënim prej 1 milion denarësh.
