Shkup, 1 dhjetor – Komisioni kuvendor për Zgjedhje dhe Emërime përcaktoi listën për zgjedhjen e kryetarit dhe anëtarëve të Komisionit Shtetëror për Parandalimin e Korrupsionit.
Shtatë kandidatët e renditur më mirë për anëtarë të Antikorrupsionit morën mbështetje nga anëtarët e Komisionit. Për kryetare është propozuar Tatjana Dimitrovska, ekonomiste e diplomuar nga Shkupi dhe punonjëse e Entit Shtetëror për Revizion, për anëtarë u propozuan gjyqtarja e Gjykatës Themelore, Sofia Spasova Medarska, dy këshilltarët e mëparshëm në Antikorrupsion, Biljana Karakashova Shulev dhe Besnik Xhemaili dhe revizorët, Zoran Bogoevski, Cveta Ristovska dhe Demiri Servet.
Lista e kandidatëve të përcaktuar i dorëzohet Kuvendit dhe pritet që kjo pikë të jetë në rend dite në seancën e ardhshme plenare. Për të votuar anëtarët e rinj të Antikorrupsionit kërkohet shumicë e thjeshtë. Anëtarëve aktualë të Komisionit, mandati u skadon më 7 shkurt dhe sipas ligjit ata nuk kanë të drejtë të rizgjidhen ose të vazhdojnë mandatin.
