Autoritetet thanë se shoferëve të kapur me shpejtësi do të dërgohet vetëm dënimi në adresën e tyre.
Autoritetet në Itali do të përdorin imazhet e kapura nga kamerat e shpejtësisë vetëm nëse shoferi bën ankim zyrtar kundër gjobës.
Gazeta Corriere della Sera raportoi se dekreti u miratua nga shërbimet italiane të mbrojtjes së të dhënave. Gazeta raportoi se kishte raporte të ndryshme për marrëdhënie të dështuara, martesa ose marrëveshje biznesi pasi fotot e kamerave të shpejtësisë zbuluan dikë në veturën e tyre që nuk pritej të udhëtonte me ta.
Zëvendëskryeministri dhe ministri i Transportit, Matteo Salvini ka kritikuar vazhdimisht përdorimin e kamerave të shpejtësisë për të ndjekur penalisht shkeljet e trafikut, duke argumentuar se bashkitë i përdorin ato për të gjeneruar të ardhura.
“Ne duhet të shpëtojmë jetë përmes parandalimit dhe kontrollit, por edhe të shpëtojmë kuletat e qytetarëve duke i çliruar nga anarkia e kamerave të shpejtësisë”, tha ministri i Transportit, Matteo Salvini.
Ministri tha se kamerat e shpejtësisë duhet të qëndrojnë në zonat me rrezik të lartë, duke përfshirë pranë shkollave dhe spitaleve, “por jo në rrugë me dy korsi për të taksuar dhe ngacmuar shoferët”.
Sipas projekt-dekretit të cituar nga Corriere della Sera, kamerat e shpejtësisë duhet të vendosen për të garantuar sigurinë dhe qarkullimin e trafikut, jo për të mbledhur para për këshillat bashkiakë.
Italia ka rreth 11 mijë kamera shpejtësie – më shumë se çdo shtet tjetër anëtar i Bashkimit Evropian.
