Shkup, 28 korrik – Presidenti Stevo Pendarovski sot ka pritur në takim shefin e Delegacionit të Bashkimit Evropian në Republikën e Maqedonisë së Veriut, ambasadorin David Gir.
Në takim u bisedua për rrjedhën e mëtutjeshme të procesit integrues evropian të Republikës së Maqedonisë së Veriut dhe për fazat na presin në negociatat për anëtarësim në Bashkimin Evropian, njoftuan nga zyra e shefit të shtetit.
Në atë kontekst, presidenti theksoi se të gjitha institucionet do të bëjnë përpjekje për të zbatuar me sukses procesin e skriningut që fillon në shtator.
Presidenti Pendarovski ka falenderuar për mbështetjen e euroambasadorit Gir dhe shprehu pritje që bashkëpunimi në vend me delegacionin e Bashkimit Evropian të vazhdojë me sukses gjatë gjithë procesit të negociatave.
Në takim u shkëmbyen mendime edhe për sfidat në procesin e negociatave, çështjet që priten të jenë më aktuale në negociata, si dhe për përfitimet specifike nga procesi.
