Beograd, 3 shtator – Ministrja e Mbrojtjes, Slavjanka Petrovska, sot në Beograd ka takuar ministrin e Mbrojtjes së Serbisë, Nebojsha Stefanoviq, me të cilin ka biseduar për disa tema, duke përfshirë edhe bashkëpunimin në fushën e mbrojtjes mes dy vendeve, si pjesëmarrje aktive në nismat rajonale të cilat janë katalizator për siguri dhe stabilitet më të fortë rajonal. Petrovska po qëndron në Beograd në kuadër të samitit të nismës rajonale “Ballkani i hapur”, kumtoi Ministria e Mbrojtjes.
Në takim, Petrovska theksoi se Maqedonia e Veriut dhe Serbia janë dy vende fqinje dhe mike dhe se bashkëpunimi i shkëlqyer ndërshtetëror mund të reflektohet edhe në fushën e mbrojtjes.
Lidhur me iniciativat rajonale në të cilat janë anëtarë të dy vendet – iniciativa SEDM, Forcat Mjekësore Ballkanike, iniciativa B-9 e Shefave të Shtabit të Përgjithshëm dhe Qendra për Bashkëpunim të Sigurisë – RAKVIAK, Petrovska dhe Stefanoviq ranë dakord që pjesëmarrja aktive në këto iniciativat janë me interes për Maqedoninë e Veriut dhe për Serbinë, theksohet në kumtesën.
Në takim, siç u tha, u diskutua edhe për vazhdimin e bashkëpunimit në fushën e marrëdhënieve me publikun, duke pasur parasysh se disa nga trajnerët e certifikuar për media në Qendrën Rajonale për Marrëdhënie me Publikun në Ministrinë e Mbrojtjes janë edhe nga Republika e Serbisë.
