Ministria e Financave prezantoi Strategjinë e 3-të të Menaxhimit të Financave Publike, një dokument bazë i cili është punuar së bashku me ekspertët e Bashkimit Evropian.
I pranishëm në këtë aktivitet ishte dhe ambasadori i Bashkimit Europian në Tiranë, Silvio Gonzato, i cili tha se se menaxhimi i financave publike është në thelb të procesit të integrimit europian, ndërkohë që konfirmojë mbështetjen financiare për Shqipërinë.
“Kjo në vetvete tregon se sa të rëndësishme janë reformat e menaxhimit të fondeve publike për qeverisjen e mirë në vend, por edhe për funksionimin e demokracisë. Bashkimi Europian ka ofruar mbështejen e saj financiare. Vitin e shkuar në mbështetjen buxhetore ne kemi disbursuar 115 milionë Euro. Tashmë jemi në fazat përfundimtare të negociatave për instrumentin e ri të rritjes që do të përfshijë edhe financime të mëtejshme”.
Duke iu referuar Strategjisë së re, Ministri i Financave Ervin Mete tha se një prej synimeve është përmirësimi i politikave fiskale.
“Synon ndër të tjera përmirësimin e mëtejshëm të politikave fiskale dhe makroekonomike, avancimin në planifikimin e integruar strategjik dhe buxhetor si dhe rritjen e monitorimit dhe raportimit.”
Strategjia e re për Menaxhimin e Financave Publike pritet të miratohet brenda 6-mujorit të parë të këtij viti nga Parlamenti, për të nisur më tej me fazën e implementimit të saj.
