Një vizitë për herë të fundit në muzeun e Kombëtares, për të parë historinë “kuqezi”, ku një pjesë, tashmë e ka shkruar edhe ai.
Edy Reja mbylli zyrtarisht aventurën e tij “kuqezi”, në ditën e prezantimit të trajnerit të ri, Sylvinho.
Në një intervistë ekskluzive për “SuperSport” me gazetarin Sokol Xhihani, Reja ka treguar gjithçka, nga emocionet e fundit të ciklit te pengu më i madh e deri te lojtari qe ai kishte me tepër për zemër gjatë kohës së drejtimit të kuqezinjve.
Sa i përket lojtarit më të mirë te Shqipëria, Reja nguron ta thotë me bindje, por Abrashi është ai i cili e ka impresionuar më shumë.
“Nuk mund të them një emër. Abrashi, Gjimshiti, Hysaj, por edhe Berisha janë ata që më kanë dhënë një “dorë”. Për rëndësinë që ka treguar ndaj fanellës, mund të them Abrashi. Ai është një lojtar që ngjason shumë me mua, me shumë temperament dhe forcë fizike. Abrashi është lojtari me të cilin jam i lidhur pak më shumë”.
