Shkup, 11 maj – Nuk ka institucion arsimor të sigurt nëse mësimdhënësit dhe nxënësit nuk ndihen të sigurt në të. Nuk mund të kemi popullatë të re të shëndoshë, nëse nuk kujdesemi për shëndetin e më të rëndësishmëve, mësimdhënësve të cilët pa rezervë bartin njohuritë te nxënësit dhe studentët.
Këtë e theksoi ministri i Arsimit dhe Shkencës, Jeton Shaqiri në konferencën përmbyllëse të projektit “Siguria dhe shëndeti në punë në veprimtaritë e arsimit dhe shkencës, të cilin e implementuan SASHK-u dhe Shoqata e Maqedonisë për siguri në punë.
“Si partner në dialogun social me SASHK-un, Ministria e Arsimit dhe Shkencës, krahas avancimit të standardit jetësor të mësimdhënësve dhe të punësuarve në institucionet edukativo-arsimore, rëndësi të madhe i kushton përmirësimit të kushteve të punës, e me këtë edhe sigurisë dhe shëndetit të të gjithë personave të përfshirë në sistemin arsimor, theksoi Shaqiri.
Gjatë viteve të fundit, theksoi ministri, MASH ka investuar në sigurimin e një mjedisi arsimor të shëndoshë dhe të sigurt, shkollat po rinovohen dhe rikonstruktohen, po ndërtohen objekte të reja, po investohet në mjete ndihmës, në pajisjen e laboratorëve.
Siç potencoi Shaqiri, Ministria e Arsimit dhe Shkencës asnjëherë nuk do të lejojë përdorimin e mjeteve dhe materialeve në shkolla apo laboratorë universitare që mund të cenojnë shëndetin dhe sigurinë e nxënësve dhe vetë mësimdhënësve.
“Besoj se rezultatet e këtij projekti do të na japin pasqyrë të qartë se si shteti kujdeset për sigurinë dhe shëndetin në arsim dhe shkencë, por do të na japë edhe udhërrëfyes drejt përmirësimit dhe promovimit të sigurisë në procesin arsimor. MASH-i ishte dhe do të mbetet partner i besueshëm i SASHK-ut në marrjen e vendimeve të rëndësishme për përmirësimin e statusit të mësimdhënësit”, u shpreh Shaqiri.
