Shkup, 12 janar – Kanë filluar punët ndërtimore për ndërtimin e shkollës fillore në Vizbeg në komunën Butel, me sipërfaqe të përgjithshme prej 12.029 metra katrorë dhe me kapacitet prej mbi 500 nxënës.
Siç paralajmëroi MASH paraprakisht, kontrata për punët ndërtimore për ndërtimin e objektit është në vlerë prej 106.590.812 denarë me TVSH, ndërsa realizimi është planifikuar të përfundojë për 18 muaj. Sipas MASH, bëhet fjalë për objekt modern shkollor, i cili përfshin hapësirë për rekreacion dhe sport dhe i plotëson nevojat dhe kërkesat e kahmotshme të banorëve të vendbanimit Vizbeg.
Carovska tha se është e kënaqur që pas tetë viteve të premtimit të kësaj shkolle për 500 fëmijë në Vizbegë, sot fillon ndërtimi.
“Për një periudhë 18 mujore duhet të bie zilja dhe nxënësit të hyjnë në shkollë dhe të ulen në bankat e shkollës. Çdo investim në arsim duhet parë si një investim në vend. Vetëm një vend që investon në fëmijët dhe arsimin cilësor mund të presë një të ardhme të ndritur. Dhe pikërisht këtë kemi treguar si Qeveri – kemi rikonstruktuar dhe ndërtuar intensivisht shkolla dhe vazhdojmë në të njëjtën mënyrë. Qeveria dje i miratoi të dyja programet e reja për vitin 2022 për rindërtimin dhe ndërtimin e shkollave fillore dhe të mesme”, tha Carovska.
Kryetari i Komunës së Butelit Darko Kostovski tha se me këtë projekt zgjidhet një nga problemet më të mëdha në komunë, jo vetëm në vendbanimin Vizbeg, sepse do të plotësohen nevojat që fëmijët të mos udhëtojnë disa kilometra deri në shkollë, por të kenë në vendbanimin e tyre.
“Që në vitin 2014, kur isha këshilltar në Komunën e Butelit, filloi ky proces. U desh shumë kohë, por është e rëndësishme që projekti fillon sot. Shpresoj që bashkëpunimi me të gjithë ata që janë të përfshirë në këtë projekt të jetë në një nivel të lartë. Komuna e Butelit do të përpiqet për mbështetjen maksimale të gjithçkaje që lidhet me këtë projekt, si dhe infrastrukturën e plotë lidhur me të, rrugët hyrëse në shkollë, ujësjellësi etj. Komuna e Butelit planifikon të investojë shumë në arsim, vetëm për tre muaj deri më tani kemi investuar 10 milionë denarë dhe ai trend do të vazhdojë sepse çelësi për zhvillimin e një vendi stabil është arsimi cilësor”, tha Kostovski.
