Presidenti serb Aleksandar Vuçiç akuzon Kryeministrin e Kosovës Albin Kurti se dëshiron ta tërheqë Serbinë në konflikt të hapur dhe luftë me NATO-n.
Në një intervistë për mediat vendase, Vuçiç bëri përgjegjëse Prishtinën për krizën në veri të Kosovës.
“Ai dëshiron të ndodhë gjithçka që unë dua të shmang. Ne nuk e kemi arritur pikun e përshkallëzimit të krizës në Kosovë, siç mendojnë disa, mirëpo Kurti dëshiron luftë. Ai lutet për diçka të tillë”.
Vuçiç tha se Kosova është duke ndërtuar një ushtri me ndihmën e Turqise, gjë që nuk i lejohet me rezolutën e Këshillit të Sigurimit të OKB-së. Ai përsëriti se edhe ushtria serbe po modernizohet.
“Turqit u kanë dhënë atyre armë shumë të fuqishme anti-tank, mortaja, obusë. Ne duhet të kemi arme te mjaftueshme qe të reagojmë nëse populli ynë kërcënohet. Brenda 5 muajve do të marrim edhe 1000 dronë kamikazë nga Lindja e Mesme dhe Kina”.
Vuçiç tha se makina e gjetur me armë në Zveçan është një inskenim nga policia kosovare, ndërsa akuzoi Kurtin se nuk përmbushi angazhimin për asociacionin e komunave serbe.
