Sipas agjencisë së lajmeve “Ansa”, presidenti i Sampdorias, Masimo Ferrero është arrestuar nën dyshimin për disa keqpërdorime financiare, por te cilat nuk kanë të bëjnë me klubin. Ferrero është dërguar në burg, ndërsa 5 persona të tjerë, janë vënë në arrest shtëpiak.
Policia financiare, arrestoi Ferreron nën dyshimin për krime korporative dhe falimentim, në një hetim të kryer nga Prokurori Publik në rajonin e Kalabrisë. Në një intervistë për gazetën “La Repubblica”, dy ditë më parë, Ferrero theksoi se është i lodhur dhe po kërkon investitorë që mund ta blejnë klubin.
“Pas tetë vitesh sakrificë, pasion, punë të palodhur, por edhe sulme e akuza personale, kam filluar të lodhem”, ka thënë mes tjerash Ferrero.
Kujtojmë se Ferrero është pronar i Sampdorias nga viti 2014, kur e bleu klubin nga familja Garone.
