Letonia ka hedhur poshtë idenë e presidentit francez, Emmanuel Macron, për dërgimin e trupave të NATO-s në Ukrainë, transmeton Anadolu.
Pas takimit në Berlin me kancelarin gjerman, Olaf Scholz, kryeministrja letoneze, Evika Silina, tha se “dërgimi i trupave nuk është çështja ajo që në fakt po na kërkon Ukrainë tani”.
“Ata po kërkojnë gjëra të ndryshme dhe kjo është arsyeja pse unë besoj se ne duhet të përqendrohemi në ato çështje që na kërkon Ukraina dhe nuk duhet të kuptojmë diçka tjetër që Ukraina nuk po kërkon tani”, tha Silina.
Ajo theksoi se aleatët perëndimor duhet të përqendrohen në prokurimin dhe dërgimin e armëve dhe municioneve që Ukraina ka nevojë urgjente për t’u mbrojtur kundër Rusisë.
“Tani Letonia dhe Gjermania po marrin pjesë në iniciativën e Çekisë (për të furnizuar me predha artilerie Ukrainën) dhe ne po blejmë municion edhe jashtë Evropës, për t’i ofruar shumë më shpejt atë që i duhet Ukrainës tani”, tha kryeministrja letoneze.
Ajo theksoi se Letonia, së bashku me Mbretërinë e Bashkuar, kanë vendosur synimin për të ofruar 1 milion drone në Ukrainë dhe të dy vendet po punojnë shumë për ta realizuar këtë qëllim brenda një viti.
