Shkup, 8 prill – Deri tani në Komisionin Shtetëror për Parandalim të Korrupsionit (KSHPK) nuk ka arritur asnjë ankesë nga askush, as anonim, as nga ndonjë denoncues i njohur, në lidhje me sekretarin e përgjithshëm në Qeveri, Muhamed Zeqiri, ashtu që për të gjithë ne kjo është një risi, deklaroi sot kryetarja e KSHPK-së, Biljana Ivanovska.
Muhamed Zeqiri sot në profilin e tij në Fejsbuk publikoi se jep dorëheqjen e parevokueshme nga funksioni i sekretarit të përgjithshëm të Qeverisë, të cilën kryeministri Dimitar Kovaçevski e pranoi.
“E respektoj vendimin e Muhamed Zeqirit për dorëheqje nga funksioni. Është një akt i përgjegjësisë politike. Qeveria së shpejti do të fillojë procedurën për zgjedhjen e sekretarit të ri të përgjithshëm”, deklaroi për MIA-n kryeministri Dimitar Kovaçevski.
Kovaçevski pret një procedurë krejtësisht transparente dhe të pavarur nga Prokuroria.
“Pres një procedurë tërësisht transparente dhe të pavarur nga Prokuroria dhe drejtësia dhe respektim të plotë të prezumimit të pafajësisë. Qeveria së shpejti do të fillojë procedurën për zgjedhjen e sekretarit të ri të përgjithshëm”, tha Kovaçevski.
Dorëheqja e Zeqirit erdhi pasi Prokuroria Publike për Ndjekjen e Krimit të Organizuar dhe Korrupsionit lëshoi një urdhër “për të kryer një hetim kundër dy shtetasve kroatë dhe një zyrtari të lartë në Qeverinë e RMV-së si zyrtar i dyshuar për kryerjen e veprës penale të shpërdorimit të detyrës dhe autoritetit”.
Prokurorja Vilma Ruskoska tha sot se lëndën për hetimin për përvetësim të nisur ndaj Zeqirit dhe dy shtetasve të tjerë kroatë e ka marrë Prokuroria në gjysmën e dytë të vitit 2021./Zhurnal.mk
