Në Gjykatën Themelore në Prishtinë ka përfunduar seanca ndaj, Sllogjan Trajkoviq, ish-zyrtari policor serb i cili është arrestuar nga Policia e Kosovës nën dyshimet për krime të luftës në Kosovë.
Ndaj të njëjtit Gjykata Themelore në Prishtinë ka vendosur masën e paraburgimit prej 30 ditësh, shkruan Reporteri.net.
Familjarët dhe avokati i tij, nuk kanë dashur të flasin për këtë çështje.
Prokuroria Speciale e Kosovës njoftoi se Sllogjan Trajkoviq së bashku edhe me persona të tjerë të uniformuar ka marrë pjesë në ofensivën ushtarake të datës 06.04.1999, në fshatin Reznik, Komuna e Vushtrrisë dhe në ofensivën e datës 02.05.1999, në qytetin e Vushtrrisë.
“Në këtë rast i pandehuri në bashkëveprim edhe me persona të tjerë ka qenë i përfshirë në keqtrajtimin, maltretimin, plaçkitjen si dhe vrasjen e personave civil dhe shpërnguljen më dhunë nga shtëpitë e tyre gjatë kohës se luftës”, njoftoi Prokuroria.
