Prishtinë, 8 prill – Policia e Kosovës sot në disa lokacione kreu operacion për parandalim të tregtisë ilegale, në kuadër të së cilës në një fshat në komunën e Vitisë, në afërsi të kufirit me Maqedoninë e Veriut, është ndaluar edhe një kamion përplot me mallra të llojllojshme komerciale, i cili kishte hyrë ilegalisht nga territori i Maqedonisë së Veriut.
Në kumtesën e MPB-së së Kosovës, ceket se në kamion, i cili ishte ndalur në fshatin kabash pasi që nuk e ka respektuar urdhrin paraprak të policisë për t’u ndalur, janë zbuluar mallra të ndryshme, si auto-pjesë, prodhime ushqimore dhe mjete stimuluese mjekësore të llojit “kamagra”.
Me kamionin, i cili, sipas kumtesës, është me targa të Kosovës, drejtonte shtetasi kosovar, i cili është identifikuar me inicialet M.M.
“Mallrat e kontrabanduara supozohet se janë futur në Republikën e Kosovës nga Republika e Maqedonisë së Veriut në mënyrë ilegale. Pas tentimit të tyre ta evitojnë urdhrin policor për ndalesë, autoritetet tona kufitare arritën ta ndalin rreth orës 11:30 në fshatin Kabash… Vlera e përgjithshme e mallit të konfiskuar do të caktohet nga ana e Doganave të Kosovës”, thuhet në kumtesë.
Aksion të ngjashëm policia e Kosovës sot kreu edhe në fshatin Shtërpcë, komuna e Ferizajt, me ç’rast në disa objekte tregtare janë konfiskuar mallra, të cilat, sipas burimeve policore, janë futur ilegalisht nga Serbia.
