Bruksel, 1 korrik – Kryeministri i Sllovenisë, Janez Jansha sot e inauguroi fillimin e presidencës sllovene me BE-në në Lubjanë së bashku me kryetaren e Komisionit Evropian Ursula fon der Lajen. Të dy konfirmuan se po punohet për një fillim zyrtar të negociatave me Maqedoninë e Veriut dhe Shqipërinë në gjashtë muajt e ardhshëm, njoftoi korrespondentja e MIA-s nga Brukseli.
Kryeministri slloven Jansha deklaroi se zgjerimi është një qëllim strategjik i Bashkimit Evropian dhe si i tillë ai pret që dilemat të zgjidhen dhe të arrihet marrëveshje midis 27 vendeve anëtare të BE-së gjatë presidencës së vendit të tij.
Kryetarja fon der Lajen nga ana e saj konfirmoi se do të bëheshin përpjekje nga Komisioni Evropian për të arritur edhe këtë qëllim.
“Ne jemi të përkushtuar për të bërë përparim në procesin e zgjerimit përmes hapjes zyrtare të bisedimeve të pranimit me Shqipërinë dhe Maqedoninë e Veriut dhe unë e mirëpres organizimin e samitit me Ballkanin Perëndimor,” deklaroi kreu i ekzekutivit evropian.
Ky samit duhet të mbahet në Slloveni më 6 tetor.
