Presidentja e vendit, Vjosa Osmani e ka denoncuar në polici ish-ambasadorin, Gjergj Dedaj. Këshilltari për medie i presidentes, Bekim Kupina për KALLXO.com ka thënë se Dedaj është denoncuar për kërcënimin publik që ia ka bërë dje presidentes në një intervistë.“Siç kemi paralajmëruar z.Gjergj Dedaj është denoncuar te organet e rendit për kërcënim publik kundër jetës dhe sigurisë ndaj Presidentes Osmani dhe familjes së saj”, ka thënë ai.
Në intervistën e tij të dhënë dje në televizionin 7, ish-ambasadori Gjergj Dedaj ka akuzuar presidenten Vjosa Osmani se e ka larguar padrejtësisht nga misioni diplomatik.“Te unë dhe familja ime dhe te malësia e Gjakovës përveç ligjit vepron edhe Kanuni i Lekë Dukagjinit, nëse më shkel dikush, më vret dikush ka mu vra edhe ai, edhe ai ka me pas pasoja, nuk do të thotë që e mbyt një njeri edhe sa problem i ki lidhjet në shtet edhe shkon në shpi”, tha ai.
Gjergj Dedaj ka qenë ambasador i Kosovës në Shkup, ai është liruar nga detyra në maj të viti 2021, së bashku më 11 ambasador të tjerë politik.
