Shkup, 19 maj – Kryetari i Komisionit për Marrëdhënie me Jashtë, Senatori Bob Menendez, në një intervitë për Zërin e Amerikës shprehu shqetësimin se aplikimi i trysnisë padrejtësisht ndaj Kosovës nuk duhet lejuar, duke theksuar se Asociacioni mund të shkaktojë paqëndrueshmëri në rajon. Senatori Menendez u përpoq të theksojë rëndësinë e qëndrueshmërisë së zgjidhjeve dhe të shmangjes së pasojeve negative që mund të sjellë implementimi i Asociacionit.
Në një seancë dëgjimore të mbajtur të enjten në Senatin e Shteteve të Bashkuara për Marrëdhënie me Jashtë, këshilltari i Departamentit amerikan të Shtetit, Derek Chollet, dhe i dërguari i posaçëm i Shteteve të Bashkuara për Ballkanin Perëndimor, Gabriel Escobar, ritheksuan edhe njëherë tjetër rëndësinë e zbatimit të marrëveshjes së Ohrit dhe krijimit të Asociacionit.
Në kontekstin e situatës së Ballkanit Perëndimor, Senatori Menendez thekson se historia ka treguar se konfliktet mund të shfaqen dhe përhapen shpejt në këtë rajon. Prandaj, është e nevojshme të merren hapa të matur dhe të sigurohet që ndërveprimi ndërkombëtar të mos ushtrojë trysni të padrejtë ndaj vendeve si Kosova.
Ai theksoi nevojën për të mos ushtruar trysni të padrejtë ndaj Kosovës për shkak të dëshirës për të parë një zgjidhje përfundimtare në rajon.
“Duket qartë se kemi shumë punë për të bërë. Ne jemi të shqetësuar. Kjo është një pjesë e rëndësishme e botës dhe Evropës. Historia na tregon se atje konfliktet mund të ndizen me shpejtësi. Është e rëndësishme të bëjmë atë që duhet dhe të sigurohemi që të mos ushtrojmë padrejtësisht trysni ndaj vendeve si Kosova, për shkak të dëshirës tonë për të parë një zgjidhje përfundimtare. Duhet të jetë një zgjidhje e drejtë”, – ka deklaruar ai.
Duke u bazuar në shembullin e ndikimit të së ashtuquajturës “Republika Serbe” në Bosnje dhe Hercegovinë, Senatori Menendez kritikon shtimin e trysnisë ndaj Kosovës për të krijuar një Asociacion të ngjashëm.
“Jam i shqetësuar për disa nga propozimet, siç është Asociacioni i komunave serbe dhe gjasat që kjo mund të sjellë paqëndrueshmëri, në vend të qëndrueshmërisë. E kemi parë në të kaluarën në vende të tjera. Nëse ato nuk strukturohen siç duhet, mund të krijojnë paqëndrueshmëri”, – tha ai.
