Kryeministri i Mbretërisë së Bashkuar, Rishi Sunak, është shprehur i shqetësuar për situatën në Kosovë, kur u pyet nga deputetja Alicia Kearns për dështimin ndërkombëtar në Ballkanin Perëndimor.
Alicia Kearns, deputete britanike dhe kryetare e Komisionit për Politikë të Jashtme e Parlamentit Britanik, e ka pyetur kryeministrin e vendit nëse do të ketë angazhim nga ai për zgjerim të mandatit të KFOR-it në Kosovë, në mënyrë që misioni paqeruajtës i NATO-s të merret edhe me armët ilegale, për të cilat tha se po futen nga Serbia në Kosovë.
“Ne jemi veçanërisht të shqetësuar, unë jam veçanërisht i shqetësuar për situatën në veri të Kosovës, të cilën ju e njihni dhe i dënojmë shumë sulmet e paprovokuara nga protestuesit ndaj personelit të KFOR-it. Sekretari i Jashtëm i ka thënë tashmë kryeministrit të Kosovës dhe Serbisë se liderët në Beograd dhe Prishtinë kanë përgjegjësi për ta ulur tensionin dhe për ta parandaluar dhunën e mëtejshme”, u shpreh Sunak, duke shtuar se duhet gjetur rruga për t’u kthyer në dialogun e lehtësuar nga BE-ja.
