Shkup, 30 dhjetor – Komisioni rregullator për energjetikë dhe shërbime ujore (KRRE) sot në seancë kryesore duhet të marrë vendim përfundimtar për çmimin e energjisë elektrike, që do të jetë me vlerë nga 1 janari i vitit të ardhshëm.
Në seancën e djeshme përgatitëse janë prezantuar mekanizmat e jashtëzakonshme që KRRE për herë të parë do t’i aktivizojë në gjendje krize. Janë pritur edhe vërejtjet në formë shkrimi nga kompanitë energjetike, të cilat do të shqyrtohen në seancë kryesore dhe do të merret vendim përfundimtar.
Çmimi i ri i rrymës për shfrytëzuesit në tregun e rregullt do të vlejë në gjashtë muajt e parë të vitit të ardhshëm. Të gjitha kompanitë energjetike tanimë kërkuan rritje të çmimit të energjisë elektrike.
