Shkup, 24 janar – Lidhja e shoqatave të diabetikëve kumtoi se sot përmes Ministrisë së Shëndetësisë dhe Shtabit të Krizave i kanë dorëzuar Qeverisë kërkesë për parandalimin e përhapjes së pandemisë me kovid-19, të miratohen masa parandaluese për lirim nga detyrimet e punës dhe të shkollës për të gjithë të sëmurët kronikë, veçanërisht për personat me diabet tip 1, diabeti tip 2 që marrin insulinë dhe kanë komplikime nga diabeti, brenda 14 ditëve me miratimin e mjekut specialist kompetent dhe mjekut endokrinolog ose diabetik, sipas kërkesës të personit.
Nga Lidhja theksojnë se kërkesa ka për qëllim parandalimin e komplikimeve shtesë dhe gjendjeve të mundshme rrezikuese për jetën tek personat me diabet.
“Situata epidemiologjike me kovid-19 është shqetësuese. Shifrat seriozisht të larta të rritjes në baza ditore, për fat të keq edhe progresi i të infektuarve të rinj nuk ndalet pavarësisht protokolleve aktuale shëndetësore. Kjo situatë për Lidhjen e shoqatave të diabetikëve është seriozisht shqetësuese, me rrezikshmëri më të lartë të ndërlikimeve në jetën e qytetarëve me sëmundje kronike, veçanërisht te personat me diabet që përmbushin përgjegjësitë e tyre të punës me aktivitetet e tyre të përditshme.
Mungesat pas këtyre masave duhet të përballohen nga punëdhënësit, në përputhje me rregullat për pushim mjekësor, për të vaksinuarit me 90 për qind të pagës, ndërsa për të pavaksinuarit ose ata që se kanë kaluar virusin korona 70 për qind të pagës. Kërkojmë këto masa duke pasur parasysh faktet aktuale që përqindjen më të madhe të sëmundjeve me korona e kanë personat me diabet dhe fatkeqësisht në pjesën e të vdekurve kjo përqindje është mbi 2/3 e numrit të përgjithshëm. Kujtojmë gjithashtu se te personat që kanë formë të mesme dhe të rëndë të koronavirusit, terapia që aplikohet shkakton diabetin dhe është rritur numri i përdoruesve të terapisë me insulinë. Të udhëhequr nga motoja se shëndeti publik nuk është biznes dhe politikë, por për një popull të shëndoshë dhe të aftë për punë, shpresojmë që kërkesat tona të pranohen si masa urgjente, thuhet në kërkesën e Lidhjes së shoqatave të diabetikëve.
