Sulmuesi këmbëshpejtë ka nënshkruar kontratë një vjeçare me kampionët e Maqedonisë së Veriut, Shkëndijën e Tetovës.
Ka qenë klubi kuqezi që ka zyrtarizuar Shalën, derisa marrëveshja është një vjeçare me mundësi vazhdimi edhe për tri vite të tjera.
Ai është shprehur shumë i lumtur dhe i nderuar që është pjesë e Shkëndijës së Tetovës.
“Është nder i madh për mua që të jem pjesë e Shkëndijës, ekipi më i mirë në të gjitha trevat shqiptare. E di se Shkëndija ka një histori të begatë me shumë peripeci në të kaluarën, prandaj kjo do të jetë një sfidë e madhe për mua”.
“Po ashtu e di se qyteti i Tetovës është i lidhur ngushtë me Shkëndijën dhe se Shkëndija i ka tifozët më të mirë në të gjitha trevat shqiptare. Unë do të jap maksimumin që të luaj sa më mirë dhe të gëzoj tifozët”, u shpreh Adenisi gjatë nënshkrimit të kontratës.
Njoftimi i plotë i klubit:
Sulmuesi i talentuar Adenis Shala prej sot i bashkëngjitet skuadrës kuqezi!
Shala ka nënshkruar me Shkëndijën kontratë 1 vjeçare me mundësi vazhdimi edhe për 3 vite tjera. Është i lindur më 23 tetor të vitit 1998. Gjatë vitit 2017 ka qenë pjesë e grupmoshave të skuadrës kroate të Hajdukut, që më pastaj të transferohet në grupmoshat e skuadrës së Fenerbahçes.
Së fundmi 22 vjeçari Shala ka luajtur në kampionatin e Kosovës, ku ka qenë pjesë e ekipit të Trepçës ’89.
Adenis Shala është sulmues i krahut, por që mund të luajë edhe në pozitën e mesfushorit ofensivë.
Adenisit i urojmë shumë fat dhe suksese në fanellën kuqezi!
/Gazeta Olle/
