Partia Demokratike reagoi ashpër pas vendimit të Komisionit Qendror të Zgjedhjeve për të mos i hequr mandatin kryebashkiakut të Mallakastrës, Qerim Ismailaj.
Belind Këlliçi tha në një dalje për mediat se në këtë mënyrë po tentohet goditja e ligjit të dekriminalizimit. Ai paralajmëroi ankimimin e vendimit të KQZ-së.
“Vendim i Ilirjan Celibashit për të mbajtur në kundërshtim me ligjin një person të dënuar në krye të Bashkisë së Mallakastrës, është tregues i një vullneti të mbrapshtë politik për të goditur ligjin më të rëndësishëm të Republikës tonë, atë të Dekriminalizimit. Një ligj që erdhi në jetë nga beteja e Partisë Demokratike për t’u dhënë qytetarëve shqiptarë institucione të pastra nga kriminelët dhe për ta shkëputur politikën me krimin.Partia Demokratike dënon me forcë shkeljen e ligjit të Dekriminalizimit dhe do ta ankimojë këtë vendim.”
Këlliçi kujtoi edhe rastet e Dashamir Tahirit, Aqif Rakipit dhe Gledion Rahovicës, kur sipas tij, KQZ ua hoqi mandatet, ndonëse emrat e mësipërm deklaronin se nuk kishin dijeni për dënimet.
